Днес, в проґрамі «Спомний собі Лемку», буде кус інакше. Не буде, як все, бесіды зо старшом особом, котра хоче нам штоси мудрого і цікавого переказати, але буде тіж про памят, минулий лемківскій світ і тугу за рідном земльом.

Днешній проґрам буде реляцийом з посвячыня пропамятного креста в єдным з сел на Лемковині. 16. липця 2015 р., в лемківскым селі Ставиша станул памятник, споминаючий тых, котры жыли в Ставишы перед 1947 р, а котры в ганебний спосіб были з того села выгнаны од Одры аж по Донбас. Як інформували сме за тым мотузком, не повело ся поставити крестного знамене на ставишскым цмонтери, з той причыны, же римокатолицкы костельны власти на тото не дозволили.