В селі Підзамочок коло Бучача Лемків єст дост дуже. Зато бесідуєме одраз з трьома Лемкынями: то дві Мариі і Дария. Про Дарию будеме більше оповідати о тыжден. А дві Мариі сут на знимці: од лівой страны Мария Зіньска, справа сідит Мария Пыж.

Бесідуєме найперше про село Ріпник, а тіж про грушкы-бабиці, про чорны перогы і черешнянку, про різдвяны традициі… З нашой передачы мож буде ся дознати, якє наазвиско давали дітині, котру нашли в поли, што то за курка, котра дзвонит, і котры Лемкы правдивы, а котры ― ніт.