Ц05:Е204
70% #204 - Даниіла Гаврилишын (з д. Кунка) з Ванівкы (1 част), 02 ІV 2016
Опис епізоду
Хто был во Львові, на улици Вірменскій, тот виділ цікавый памятник: при столику сідит якысый пан, а його колеґа - то друга част того памятника - выхылил ся з вікна і йому штоси кричыт. То славны львівскы аптекарі – Ян Зеґ і Іґнаций Лукасєвич. Они в 1853 році вынашли нафтову (по украінскы ― гасову) лямпу.
Памятник поставленый ту неприпадково: в тым домі єст реставрация-музей «Гасова лямпа». Ту мож не лем штоси зісти і выпити, а і посмотріти на колекцию такых лямп, котры світили колиси всядиль, тіж і в каждій лемківскій хыжы. При нагоді, ту мож дознати ся штоси о добываню ропы в Галичыні в ХІХ-ХХ столітях.
І зато, же тота лямпа дост проста, выгідна, туня і все потрібувала камфіны, в Галичыні зачали скоро ся розвивати нафтовы промыслы, найперше ― в Бориславі, «Галицкій Каліфорниі», а пак і в інчых місцях, тіж в селі Ванівка коло Коросна. Выдобываня нафтовой ропы одраз змінило міста і села де єй нашли. Змінила ся і Ванівка: на місци старой деревяной церкви поставлено ту величезну мурувану (видите єй на знимці). Збудувано нову школу, велику чытальню…
Не дивне, же дост дуже мешканців Ванівкы, якы уж знали ся на добываню ропы, по выселіню в Радянску Украіну поіхали до Бориславя. А мы ідеме до іщы єдного «нафтового» місточка - Долины. В Долині Івано-Франківской Области мешкат Даниіла Гаврилишын (з дому - Кунка). Она вродила ся в Ванівці в 1938 році. Долгы рокы учытелювала в музичній школі, 12 років рядила долиньскым, лемківскым, женьскым вокальным ансамбльом «Відгомін Бескидів». Бесідуєме о Ванівці, о непростій доли родины пані Даниілы, о пісни «Бородіно», яку співал хор того села, о маминій шлюбній сукєнці, дармо пофарбуваній на чорно. А про ансамбль побесідуєме о тыжден. І не лем про ансамбль…
