22. мая 2016 р. в Івано-Франківску одбыло ся посвячыня нового грекокатолицкого храму. Чын высвячыня завершыл Архієпископ і Митрополита Івано-Франківскій Кыр Володимир (Війтишын). Церков святых словяньскых апостолів Кірила і Методия частійше называют просто «лемківска церков», прото же своім архітектонічным стильом навязує до лемківскых храмів, а і будівничыма были Лемкы. Самы Лемкы то переважаюча част парафіян, а ініциятором будовы был лемківскій священник – о. Анатолій Дуда-Квасняк.

В 2002 році на пляцу де стоіт церков (ул. Галицка) заплянувано поставити пропамятний знак Украінцям выселеным з Польщы в роках 1944-46. З той причыны остал оголошеный конкурс проєктів, котрый доднес являт ся незреалізуваным. Зато лемківскій парох з Монастыриск запропонувал в місце памятника поставити невелику церков.

Дост долго тырвало зрыхтуваня необхідніх документів, м.ін. здобываня позволінь на будову. Долго і будувала ся тота невелика церков – фундаторами были самы вірны. Ден посвячыня был великом радістю для вшыткых. На торжество зьіхало ся гідні люди не лем з Івано-Франківской Области, але тіж з Львівской і Тернопільской, а пришли і з дальшых сторін.

Для тых, котры не мали змогы приіхати – даєме можливіст быти присутным на реченым посвячыню.