Різдво Христове, Новый Рік і Богоявліня - Лемкы в Тернополи святкуют тоты три свята в єдным. Сходят ся з цілой тернопільской области на сам Йордан.

Ниґда не можеме войти двараз в тоту саму воду. Зато і «Лемківскый Йордан», хоц подібный до того, якым был рік, два ци пят тому, але все кус інакшый. На березі Йордану споминаме нашы традициі, віншуваня, коляды, співаме, танцуєме, честуєме ся, тішыме ся святом і… єден другым. Єст кым ся тішыти - бо то велика стріча Лемків; сходят ся ту, в домі культуры «Березіль», аж пятсто люди.

Но і мы тіж не лем гостиме ся і святкуєме, но і при тым бесідуєме. Тыжден тому слухали сте інтервю з ґаздиньом того свята Віром Дудар. А в тым проґрамі нашы респонденты - то Лемкы старшого поколіня: Іван Джула з Королика Волошского і Параска Трач (з дому Ванько) з Мысцовы.