Не знатя, хто піддал полянчанам мысель сфотоґрафувати ся як раз так – вшыткым одраз, цілом сельском громадом. Але то была прекрасна ідея. Выбрано для того найліпшый ден – Великден. Ден, коли каждый чловек чыстый душом і тілом, а і позбераный святочні, і світит ся радістю, ничым ся не трапит, позабыл свою грызоту. По воскресній Службі Божій 1914 рока полянчане разом з єгомостьом стали до знимкы пред свойом церквом. І так лишыли ся на тых знимках для нас навікы.
