Пренос Божеской Літургіі з церкви Рождества Пресвятой Богородиці в Ґожові. Православна церков Рождества Пресвятой Богородиці в Ґожові приналежыт до щеціньского деканату вроцлавско-щеціньской єпархіі Польской Автокефальной Православной Церкви. Першы літургіі для вірных в Ґожові были одслужены на Великден 1963 р. і товды была зряджена православна парохія. Церков вознесли в роках 1989-1995 завдякы жервенности в векшыні лемківскых родин – переселеных в акциі «Вісла» на західні польскы землі з села Королева Руска при Новым Санчы та іх потомных.
