Перше православне богослужыня одбыло ся в Тожымі в 1948 році. Выселены гын Лемкы, головні з Фльоринкы, зорґанізували каплицю в малій цмонтірній понімецкій каплици. Выремонтували єй і принесли іконы, котры привезли зо собом з Гір.
По зрыхтуваню святыні до потреб православных богослужынь, початком 1951 рока ХІХ-вічна євангелицка капличка стала ся церквом, котра была дана під покров св. Михала Архангела. Першый поміщеный гын іконостас парохіяне зробили самы. Коли в Ґожові вознесли нову церков з новым іконостасом, старый перенесли до Тожымя.
В 1982 р. каплицю побільшыли о притвор, а в 1994 р. ґрунтовні одремонтували. Находит ся в сусідстві цмонтеря. При вході до храму находит ся пропамятна таблиця посвячена вмерлому в 2005 році о. прот. Антонийови Габурі.
