Пренос Божеской Літургіі з церкви Успінія Пресвятой Богородиці в Зимній Воді в нижньошлезкым воєвідстві. Істория православной парохіі в Зимній Воді є безпосередньо повязана з акцийом Вісла. Была она офіцийні ериґувана в серпни/авґусті 1947 рока о. митр. Йоаном Левярьом. Парохію з зачатку творило двадцет єден русиньскых родин з Бортного на Лемковині та двадцет родин Украінців з Холмщыны. Інтересуюче, што традициі церковного співу принесены на чужыну выселeнцями з Бортного перетырвали в тій парохіі до днес.
