Еп. 01
Познайме ся
Опис епізоду
Лемківскій язык здає ся быти легкій. Прецін бесідуєте, гварите ци радите од маленького. Сучасний світ влинул на лемківскій язык дост міцно. А же в лемківскым радию радит ся, очывидно, по лемківскы, то будеме дбати, жебы сме і мы, і вы бесідували як за діда прадіда. Бо може на обід, ци барже полуденок не іме зімняків, а компері, ґрулі ци бандуркы, а на поляні не росне каченец ци стокротка, але лотат і курідупка. Тоты і інчы явиска будеме собі припоминати власні на лекциях лемківского языка. Призриме ся тіж теперішнім сучасным ґратям і явискам і спрібуєме іх назвати по “нашому”. Тот програм будете творити разом зо мном, зато, же все будут для Вас домашні задачы, а найліпшы ученикы останут выріжнены на антені нашого радия. Підеме тіж з ґадалом до шкіл і підслухаме як ся вчат “нашы” діти і молодіж.
